2027 東京馬拉松全新視覺設計出爐啦！

7月10日

讀畢需時 3 分鐘

2027 東京馬拉松主視覺曝光！設計師安田昂宏親自操刀 20 周年視覺，將彩色線條拆解成照亮彼此嘅「發光圓點」

東京馬拉松去到 2027 年就正式踏入 20 周年啦！最近官方就公開咗全新嘅 2027 東京馬拉松主視覺設計。今次官方再次搵嚟設計師安田昂弘（Akihiro Yasuda）親自操刀，佢將原本舊有 Logo 嘅概念再進一步延伸，將原本一條條五顏六色、交織埋一齊嘅「線」，帶返去最根本、構成一切嘅「發光圓點」！

由彩色嘅「線」去返獨立嘅「點」

東京馬拉松喺 2007 年首辦，依家已經係世界六大馬拉松之一。喺 2016 年嗰陣，東馬換咗個由多色線條交織而成嘅 Logo，當時嘅設計師今井祐介係想用唔同色嘅線條，去代表跑手、義工同埋觀眾呢啲唔同嘅個體，象徵大家每個人都有自己嘅價值觀、目標同故事；當呢啲線條交疊埋一齊，就代表住成個賽事同東京呢個城市凝聚成一體。

嚟到 20 周年（第 20 屆賽事），安田昂弘就將目光帶返去「線」形成之前，聚焦喺象徵住每一個人嘅「點」上面。成個設計概念係由「點＝自己」呢個出發點嚟引申。每個人都有自己嘅身體同靈魂，平時喺日常生活裏面好好照顧自己、調整狀態、保持步伐，去到某個重要時刻就盡情釋放自己。

呢啲「點」代表嘅唔單止係企喺起跑線嘅選手，仲包括沿途幫手嘅義工、條街度嗌破喉嚨加油嘅觀眾、工作人員、全東京嘅市民，甚至係所有用唔同方式參與東馬嘅人。每個人都有自己嘅節奏同故事，喺各自嘅位置出發，最後喺賽事入面相遇、交匯，由點連成線，再變成一個大群體。

發光嘅「點」互相照亮集結成最閃耀嘅光芒

喺視覺效果方面，安田昂弘特登用咗黑色背景，去襯托白色同埋彩色嘅圓點，令到每一個點睇落好似喺黑夜中發光咁。白色圓點代表每個人，而隔籬嘅彩色圓點就代表大家自身散發出嚟嘅光芒。當每個人照亮自己嘅同時，亦都照亮緊身邊嘅人，啲光互相反射，最後聚集成一束代表共同目標、照亮未來嘅光。

呢啲不規則排列嘅畫面，令人一睇就聯想到馬拉松賽道上，每一個同自己打緊仗、不斷向前衝嘅跑手痕跡，仲有場邊打氣嘅觀眾同默默耕耘嘅工作人員。由點變線，由線變面，再喺呢個面入面誕生新嘅點，繼續延續無限可能。

對迎來第 20 屆嘅東京馬拉松嚟講，今次 2027 嘅主視覺不單止係一次「回歸原點」，仲係一個新嘅開始。

順便介紹埋：主視覺設計師安田昂宏到底係邊個？

雖然連續兩年幫東馬操刀主視覺，但「安田昂宏」呢個名對大家嚟講可能有點生疏，不過其實佢嘅設計早就融入咗大家嘅日常生活。

1985 年喺名古屋出世嘅安田昂宏，畢業於多摩美術大學平面設計系，以前喺出名嘅設計公司 DRAFT 做過，2015 年獨立之後加入咗跨國創意團隊 CEKAI，以藝術總監同平面設計師嘅身份，活躍喺品牌、數碼、產品、影像同空間等唔同領域。

大家最熟悉佢嘅作品，莫過於佢擔任日本全家便利店（FamilyMart）旗下服裝品牌「Convenience Wear」嘅藝術總監。呢個以「好素材、好技術、好設計」做主打嘅品牌，自 2021 年起風靡全日本。佢用透明密實袋、大字型片假名、日英文雙語標示，加埋簡潔到暈嘅包裝系統，令到原本好普通嘅襪、毛巾、底衫，搖身一變成為勁有設計感、好有辨識度嘅潮流商品。

安田昂宏覺得，客人在便利店買嘢，第一眼一定係被包裝吸引，所以佢特別睇重呢一環。加上超商有好多外國遊客，所以佢用透明袋設計，等大家一眼就睇清入面係乜。